روینشتن

 

ژ نڤیسینا: هێربێرت ئیدوارد فرانسیس *

و. ژ. ئینگلیزی: شەمال ئاکرەیی

ل سپێدەهییەکێ، خودانێ مالێ ژ خوە هشیار بوو دیت، کو ژنەک و مێرەک یێن ل بەر دەرازینکا خانیێ وی د روینشتینە. د پەنجەرکا شویشەیی یا دەرگەهێ خانی ڕا ما و زێرەڤانییا وان دکر. بوو ئیڤاری، بەلێ ئەو ژن و مێر ل وی جهی نەچوون. خودانێ مالێ مەندەهۆش بوو، ئەرێ ئەڤە کەنگی خارنەکێ دخۆن، کەنگی بێهنا خۆ ڤەددەن و دنڤن. کەنگی ب کار و ئەرکێن خۆ یێن ژیانێ رادبن. ل رۆژا پاشتر، ل گەل ئەلندێ لێ نێڕی، هێشتا یێن ل جهێ خۆ. نە تیرۆژکێن رۆژێ و نە بارانێ کاریگەری ل سەر رەوشا وان دکر. ل بەراهیێ ب تنێ جیرانێ وان یێ نیزیک های ژێ هەبوو، ئەو ژی مەندەهۆش ما بوو و د پرسی: ئەڤە کینە؟ و ل بەردەرگەهێ جیرانێ من چ دکەن؟ ئەوی ژی تشتەک ژێ نەزانی.  جیرانێن ل ئالیێ بەرامبەر، پەیادە و خەلکێ ب وێ جادێ ڕا دەرباز دبوو هەمییان، دپرسی. بەلێ کەسێ نەزانی ئەو هەردو ژن و مێر ل وێرێ چ دکەن و چ دڤێت!

 جیران، ناسیار، پۆستەچی ئەوێ رۆژانە نامە و پۆست دگەهاندنە دەرازینکا مالێ، کرێکارێن پاکژکرنێ و گەلەک ژ خەلکێ باژێڕی ب رێ یا تەلەفۆنێ ژ خودانێ مالێ د پرسین، ئەو هەردو بیانی کینە ل بەر دەرازینکا مالا وە روینشتین؟! دڤێت کارەکی ب کەت. رابوو و داخواز ژ وان کر ژ دەرازینکا مالا وی دویر بکەڤن. بەلێ وان هیچ گرنگییەک ب داخوازا وی نە دا و مان روینشتی و ب چاڤەکێ سەیر ل خودانێ مالێ دنێڕی.  گۆتە وان، کو ئەو دێ پۆلیسان ئاگەهدار کەت. پۆلیس هاتن و هەمان داخوازی ژێ کر. پۆلیسان بۆ وان شرۆڤە ژی کر، کو ئەگەر رەوش ل سنوری دەرکەفت، دی وان ب کوتەکی ب ترۆمبێلا پۆلیسان ژ وێرێ دویرئێخن. لێ دیسان هیچ پویتە ب ئاگاهیێن پۆلیسان نەدان. پۆلیسان ئەو ل ترۆمبێلێ سوارکرن و برن. بەلێ ل سپێدێ زڤڕین! بۆ جارا دویێ پۆلیسان ئاگەهدارکرن، کو ئەگەر ژ وێرێ نەچن و ئەگەر خودانێ مالێ رازی بوو، دێ وان هاڤێنە د گرتیخانێ دا! خودانێ مالێ گۆتە پۆلیسەکی:

-       دڤێت هوین ڤێ ئاریشەیێ چارەسەر بکەن، چونکی ئاریشەیا وە پۆلیسایە. پۆلیسان بەرسڤا وی داڤە و گۆتێ:

-       ب راستی ئەڤە ئاریشە یا تەیە. ل دویماهیێ پۆلیس و خودانێ مالێ، شیان وان هەردو ژن و مێران ژ وێرێ دویر بێخن. ل سپێدەهییا رۆژا پاشتر، خودانێ مالێ د پەنجەرێ را دیت، کو ئەو ژن و مێڕ دیسان ل هەمان جهـ یێن دروینشتینە. بۆ ساڵێن درێژ هەر مان روینشتی. ل زڤستانێ، ل بەر سڕ و سەقەمێ، خودانێ مالێ پێشبینییا مرنا وان کر. بەلێ پێشبینییا وی، راست دەرنەکفت و ئەو ب خۆ مر! ژبەر کو خودانێ مالێ،   چ خزم و کەس و کار نەبوون، خانی بۆ باژێڕڤانیێ ما، بەلێ ئەو ژن و مێر هەر مان روینشتی ل بەر دەرازینکێ. دەما باژێڕڤانیێ گەف ل وان کرین داکو وی جهی بهێلن و بچن. جیرانان و هندەک ژ خەلکێ باژێڕی، سکاڵایەک ل دژی باژێڕڤانیێ بلند کر. بەهانەیا وان ئەو بوو، کو ئەوان ژن و مێڕان ساڵێن درێژ یێن ل وی جهی بۆراندین و مافێ وانە ئەو خانی پشتی خودانێ وی مری، بۆ وان بکەڤیت و خانی بۆ وان ! خودانێن سکاڵایێ د ڤێ دۆزێ دا ب سەرکەفتن، خانی بۆ مولکێ ئەوان ژن و مێران. ل سپێدەهییا رۆژا پاشتر، دەمێ ئاکنجیێن باژێڕی ژ خەو هشیار بووین دیتن، کو ل بەر دەرازینکا هەر مالەکێ جوتەکێ ژن و مێرێن بیانی د روینشتینە!! – ١٩٨٣

 

 

 

* هێربێرت ئیدوارد فرانسیس Herbert Edward Francis: پرۆفیسور و نڤیسەرەکێ ئەمریکی یە، ل ١١ێ کانوونا دویێ یا ساڵا ١٩٢٤ێ، ل بریستۆل، رۆد ئایلاند  Bristol, Rhode Islandهاتییە سەردونیایێ. ل زانینگەها ئالاباما ل هانتسڤیل University of Alabama in Huntsville، بسپۆری زمانێ ئینگلیزی بوو. هەفت بەرهەمێن چاپکری هەنە، کو پێنج ژ وان کۆمێن کورتە چیرۆکانە. هەژمارەکا خەلاتان ب دەستڤەئیناینە، ژ وانا: خەلاتێ باشترین چیرۆکێن ئەمریکی، خەلاتێ پوشکارت  Pushcart و خەلاتێ زانینگەها ئەلاباما یێ ئەدەبیاتێ.

 

ژێدەر:

-       https://midgardib2014.wordpress.com/assessment/written-tasks/wt1-creative-assignment/text-types/short-

https://apps.lib.ua.edu/blogs/this-goodly-land/author/?AuthorID=56

 

-